تذكرون لما اييلك واحد مليغ من العايله اكبر منك ويقولك تبي اسويلك ساعه وانت تمدله ايدك ويقوم يعضك ذيج العضه اللي تصارخ منها . تذكرون لما كنا نصور فوري عند مصور الجمعية وطبعا غصبن عليك الخلفيه زرقه مب بكيفك ولازم تمشط شعرك بالمشط اللي عنده كله شعر وبعدين يغسلك الصورة بالآله اللي عنده ام ذراع والاطراف مشرشره يعني يكون حركه . ويعطيك الصور بعد أسبوع تذكرون اول يوم دوام بالمدرسه كانوا يسلمونا الكتب كلهم مع بعض وصافينهم من الكبيييييييييير لي الصغير وطبعا الكبير كتاب العلوم وكانوا يربطونهم بحبل عشان ما يطيحون مع 6 دفاتر - تذكرون المعجون الصغير اللي ريحته تعور الراس ومعاه عود لونه احمر وكنا نبطله بالمجلوب ونعصره ونلف العود عليه وننفخ عشان نسوي نفافيخ وطبعا ما تطلع النفاخة الين تطلع بلاعيمك وياها . تذكرون لما كنا نشوف افتح ياسمسم وانتأثر بكعكي اللي ياكل بسكوت ونشتري بسكوت كاكاو ونقعد ناكل مثله ويا البسكوت المالح خخخخخخ. تذكرون يوم الجمعة ... نقعد من الصبح علشان نسمع أغنية في قصص الشعوب قصائص لا تنتهي وعالم حلو بهي يسكن في القلوب في قصص الشعوب . تذكرون تيلفون بوقرص اللي يخيب ثناك وانت تتصل وياااااااويلك يطلع الرقم مشغول لان مافي ريدايل. تذكرون لما كنا نربط الشرشف على رقبتنا مثل سوبرمان ونصعد فوق الكبت وانط على الدواشق واخر شي ناقز غلط ومنكسره ايدك.... تذكرون شريط الجراخي الاحمر اللي اذا اخترب المسدس ماله ما يبيله كلام حًول على كعب الوالده وكمل عليه بالكاشي والا على كاشي الباب اخر شي الوالده مكمله عليك بالكعب تذكرون لما كنا نحط بالفريزر العصير الطويل بونصين عشان يثلج وكل ماتروح تبي تاخذه تلاقي الوالده منزلته تحت وماثلج.....راحت الفرحه . تذكرون لما كان الاولاد يغسلون الحوش بالبروش والصابون قمة الوناسه يمسك المساحه يعني يكون بيساعد واخر شي طايحله سكيتنج على الكاشي والزوليه وفليل وارمه ريله. تذكرون لما كنا نستقبل الحجاج من زود الفرحه واللهفه على الصوغه واخر شي كم مسواك وقحفيتين والكاميرا الحمره وسياده والبنات قطعه خام مالت هنود وساعه. تذكرون لما كنا نشوف مسرحيات الأطفال مثل السندباد والزرزورر والف باء تاء اللي فيها عبدالرحمن العقل ولما الحرامي يكون وراه نصرخ من قمة راسنا ورااااااك وراااااااك وهو يقول وينه وينه يميييييين يميييييين....ياعيني على الاستهبال . تذكرون عزايم قبل والصفره المفروشه على كبر الصاله اللي على صورة ( فواكه ) وريحته لازم ريحة مطبخ وجالسين على الزوليه اللي يوم تقوم تلاقي ريلك كلها شخوط من الزولية..يا خي شو هالزهد بس. تذكرون ايام الدراسه قبل يعني يكون بنشد حيلنا بالدراسه ونشتري قلم فسفوري اصفر ولا برتقالي عشان نظلل على الشي المهم اخر شي مظللين على كل الكتاب وين الشي المهم مادري. تذكرون ايام الكشخه قبل كانت عباره عن سيارة هوندا بيضه اكورد باب واحد ولازق على الرقم من ورى شعار نادي الأهلي يعني كووول والمشط بالدرج اللي على قبضة يد سيارة الجاكسون وحاط بالمسجل فرقة الدانه ولا عبدالكريم . تذكرون اول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثواره .... ولازم طبعا يمر على الربع بالفريج يصيح ويلات عليهم....واديلوووووو بريك وبترول تذكرون لما كانت جائزة البيبسي سياره بغطيان الغراش كنا الظهر نروح ورا الدكان ونبطل الغراش كلها وبعدين نرد نسكرهم اي كلام تشوف الغازات كلها طايره ومتبخره وصاير ماي . تذكرون لمايقول الاستاذ او المدرسة ان هذي الصفحات ملغيه ايوااااااااااا تعال شوف الشخابيط اللي على الصفحه من فوووووووووق اللين تحت ولا نطرها من الكتاب.....ليش هالحقد عاد ...... تذكرون لما نتضارب مع ولد الييران وتقوله وخرعن بيتنا وعن رصيفنا يقولك مب رصيفكم هذا رصيف الحكومه كلام منطقي الصراحه , ويقعد يحوس جدام البيت ويمر جدام ويقولك ماجستك ما جستك خخخخخ . تذكرون لما يروحون الأولاد السوق مع الوالد يشتري لهم قطع ثوب حق العيد ..اخر شي شاري طاقه كامله نفس اللون وتشوف باول يوم العيد من الوالد اللين الاخو الصغير نفس الثوب ( تقول فرقة عياله.) تذكرون يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووبا واخر شي منكسره ظهورهم ..... تذكرون المسجل الأسود مال استاد الانجليزي يوم يدش علينا فيه قمة الوناسه اليوم ما فيه شرح يعني مافي اسئله ونرووووح نشغل الراديو يوم يكون مشغول ويا الطلاب ..... تذكرون لما نقلد رقص مايكل جاكسون ونسوي حركه الرجعه وحركه الايد اللي على الجامه ونغني بيييييييييييلييييييييييه بييييييييييلييييييييه شو بيله مادري.
حُرالبحرين مدير الموقع
عدد الرسائل : 885 العمر : 44 الموقع : بحرين الخير تاريخ التسجيل : 22/08/2007
موضوع: رد: ذكريات الثلاثاء مارس 25, 2008 1:27 am
بووووووووو غبار بو سبيل
ولا سالفت كعكي
يعطيك العافيه
عابر سبيل مشرف القسم العام
عدد الرسائل : 1156 تاريخ التسجيل : 28/08/2007
موضوع: رد: ذكريات الثلاثاء مارس 25, 2008 1:29 am
بس شي حلو يالحر
والله اني اتحسر على ذيك الأيام
المبدع زيدان مشرف القسم الرياضي
عدد الرسائل : 1761 العمر : 44 الموقع : المحرق تاريخ التسجيل : 24/08/2007
ولا بعد ارموت الي كان يطلع اصوات .... والبلاكات مال اسيارة كنه انحط فيهم ريش من وره ومن جدام باروت مال الجباريت ...... وسياكل حق مابعد الامتحانات.....وطولات المدارس ولقلب المجروح وحروف وحرف صديقة يزعم
ايام لاتنسي
_crazy Ball_ مشرف قسم البنوتات
عدد الرسائل : 673 العمر : 36 الموقع : -------- تاريخ التسجيل : 23/08/2007
موضوع: رد: ذكريات الثلاثاء مارس 25, 2008 7:08 pm
أي والله صج أيام ذكرتنا في زمان أول ياليت الشباب يعود يوما ككككككككككككككككككككككككككككككك الصراحه أنا مامريت بكل ذي بس في أشيه لحقت عليها ومشكور حده الموضوع عجيب يا بو أحمد
عابر سبيل مشرف القسم العام
عدد الرسائل : 1156 تاريخ التسجيل : 28/08/2007
موضوع: رد: ذكريات الأربعاء مارس 26, 2008 12:46 am
حياج الله اختي
زيزو
والله ذكرتني بأحلى ايام عمري
بلكات السيارات والمسامير بدال بوز الدوامات والباروت والجباريت
وزينة الزنوبه بالدبابيس الملونه
وطاولة المدرسة كانت دفتر رسم لي
واذكرك بشي
تذكر علوج بو اربعنات لين نقطه في البيبسي شيسوي
عقب ما يطيش ونشرب البيبسي نطق في الغرشه عشان يطيح العلج وناكله
الله على ذيك الأيام
المبدع زيدان مشرف القسم الرياضي
عدد الرسائل : 1761 العمر : 44 الموقع : المحرق تاريخ التسجيل : 24/08/2007
موضوع: رد: ذكريات الأربعاء مارس 26, 2008 6:49 am
هتانة مشرف القسم الإسلامي
عدد الرسائل : 1684 العمر : 39 الموقع : مملــــــكة المحرق تاريخ التسجيل : 27/08/2007
موضوع: رد: ذكريات الأربعاء مارس 26, 2008 11:57 pm
في اشياء لحقت عليها وفي اشياء ما لحقت عليها
بس مثل ما يقولون دائما عتيج الصوف ولا يديد البريسم
مشكور اخوي على الذكريات الحلوة
وان شاء الله حياتنا وحياة عيالنا احلى واحلى
رحال عند الغروب عضو ذهبي
عدد الرسائل : 341 العمر : 42 الموقع : الله لايحرمني منج يالبحرين تاريخ التسجيل : 25/03/2008
موضوع: ذكريات 
الثلاثاء مارس 25, 2008 12:49 am
